Кыргызстанда 232 мал чарба субъектине асыл тукум макамы ыйгарылды
Суу ресурстары, айыл чарба жана кайра иштетүү өнөр жайы министринин 2026-жылдын 7-апрелиндеги буйругунун негизинде өлкө боюнча 232 мал чарба субъектине асыл тукум макамы ыйгарылды. Бул тууралуу ведомстводон билдиришти.
Анын ичинде 97 кой чарбасы, 5 эчки чарбасы, 84 ири мүйүздүү мал чарбасы, 40 жылкы чарбасы, 3 топоз чарбасы, 4 канаттуулар чарбасы жана 4 аары чарбасы бар.
Маалыматка ылайык, асыл тукум субъекттерине тиешелүү күбөлүктөр даярдалып, Чүй облусундагы чарбаларга министрдин орун басары М.И. Дүйшеев тарабынан салтанаттуу түрдө тапшырылды.
Министрликтен белгилешкендей, акыркы жылдары мал чарбасын өнүктүрүү жана асыл тукум иштеринин сапатын жогорулатуу багытында системалуу иштер жүргүзүлүүдө. Натыйжада асыл тукум макамын алган чарбалардын саны көбөйүп, тармактын өндүрүмдүүлүгүн жана экспорттук мүмкүнчүлүктөрүн арттырууга шарт түзүлүп жатат.
Ошондой эле мындай иштер фермерлерди колдоого жана ата мекендик асыл тукум чарбаларды өнүктүрүүгө багытталган маанилүү кадам экени белгиленди.
