Жол кыймылынын эрежелерин так сактоо талабы эскертилүүдө
Милициянын кайгуул-күзөт кызмат полкунун кызматкерлери Бишкек шаарында жеке жүрүү каражаттарын пайдалануучулар арасында алдын алуу иш-чараларды өткөрүүдө. Ага ылайык, Бишкек шаарынын ИИББнын кызматкерлери борбор калаанын аймагында электр чыгырыгы, велосипед, мотоцикл жана башка ушул сыяктуу жеке жүрүү каражаттарын пайдаланган жарандар арасында профилактикалык иш-чараларды жүргүзүүдө.
Бишкек шаардык ИИББнын басма сөз кызматынын маалыматына ылайык, өткөрүлүп жаткан иш-чаралардын алкагында милиция кызматкерлери - жол кыймылынын эрежелерин сактоо боюнча түшүндүрүү иштерин активдүү жүргүзүшүүдө.
Тактап айтканда, жарандарга жол кыймылынын эрежелерин так сактоо; жөө адамдар өтүүчү тилкелерден өтүүдө транспорт каражатынан түшүү; тротуарлардын атайын бөлүнгөн тилкелери менен гана жүрүү керектиги эскертилүүдө.
Мындан тышкары, эреже бузууга жол берген айрым жарандарга карата Кыргыз Республикасынын Укук бузуулар жөнүндө кодексинин 190-беренесине ылайык административдик протоколдор түзүлдү.
