Кемин мал базарында документи жок ондогон мал артка кайтарылды
Чүй облусунун Кемин районундагы мал базарда жүргүзүлгөн мониторинг учурунда бодо малдын 30 пайызынын, ал эми кой-эчкинин 60%ынын кулагындагы биркасы жана коштоочу документтери жок экени аныкталды. Бул тууралуу Ветеринардык жана фитосанитардык көзөмөл кызматынын Бишкек шаары жана Чүй облусу боюнча регионалдык башкармалыгынын жетекчисинин орун басары Мухамед Дуванаев билдирди.
Маалыматка ылайык, 24-майда өткөрүлгөн текшерүүнүн жүрүшүндө базарга чыгарылган малдын биркалары, чиптери жана коштоочу документтери текшерилип, мал базардын ветеринардык-санитардык абалы көзөмөлгө алынды.
Маалыматка ылайык, учурда Кемин мал базарына Чүй облусунан тышкары Нарын жана Ысык-Көл облустарынан да мал алып келинет. Бүгүнкү күндө базарга болжол менен 1000 баш жылкы, 1000ге жакын бодо мал жана 3000ден ашуун кой-эчки чыгарылган.
Текшерүүнүн жыйынтыгында биркасы жана тиешелүү документтери жок болгондуктан 20га жакын мал базарга киргизилбей, артка кайтарылды.
Адистердин айтымында, базардын санитардык абалы талаптарга жооп берет. Ошол эле учурда республикадагы бардык мал базарларда күтүүсүз мониторингдер мындан ары да улантылары белгиленди.
