Кыргызстанда 1 831 күнөскана чарбасы иштеп жатат

2026-жылга карата Кыргызстанда жалпы аянты 298,1 гектарды түзгөн 1831 күнөскана чарбасы иш алып барууда. Өлкөдө күнөскана сектору өзгөчө түштүк аймактарда активдүү өнүгүп жатканы байкалат. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.

Маалыматка ылайык, күнөсканалардын саны боюнча Жалал-Абад облусу алдыңкы орунда турат. Аймакта жалпы аянты 120 гектарды түзгөн 805 күнөскана чарбасы иштейт. Ош облусунда болсо 53 гектар аянттагы 390 күнөскана катталган.

Чүй облусунда жалпы аянты 81,1 гектар болгон 311 күнөскана иштеп, технологиялык жактан өнүккөн жана ири чарбалардын үлүшү жогору бойдон калууда. Баткен облусунда 19 гектар аянттагы 186 күнөскана чарбасы бар.

Мындан тышкары, Ысык-Көл облусунда 82 күнөскана 8 гектар аянтта иш алып барса, Нарын облусунда 12 гектар аянттагы 40 күнөскана, Талас облусунда 5 гектарды түзгөн 17 күнөскана чарбасы катталган.

Адистер белгилегендей, салкын мезгилде күнөсканаларды жылытууда негизги энергия булагы катары көмүр кеңири колдонулат. Учурда чарбалардын 85%га жакыны көмүр менен жылытылат. Негизинен Кара-Кечке кенинин көмүрү жана Казакстандан импорттолгон көмүр пайдаланылууда.

Ал эми электр энергиясы сугаруу, желдетүү жана насос жабдуулары үчүн колдонулуп, чарбалардын 8%ында пайдаланылат. Жаратылыш газы болсо инфраструктуралык чектөөлөргө байланыштуу 6%га жакын чарбаларда гана колдонулууда.

Жалпысынан Кыргызстанда күнөскана сектору жылдан жылга өнүгүп, заманбап технологияларды колдонгон чарбалардын саны акырындык менен көбөйүүдө.