Миң-Кушту туризм аркылуу өнүктүрүү маселеси көтөрүлдү
Нарын облусунун Жумгал районунда “Миң-Куш айылын туруктуу туризм аркылуу өнүктүрүү — Унутулган шаарларды жандандыруу” аталышындагы форум болуп өттү. Бул тууралуу Президенттин администрациясынан билдиришти.
Иш-чара 2023–2027-жылдарга карата Тоолуу аймактарды өнүктүрүү боюнча иш-аракеттердин беш жылдыгынын алкагында уюштурулду.
Форум Миң-Кушту жаңы туристтик багыт катары таанытуу жана Жумгал районунун туруктуу өнүгүүсүн талкуулоо үчүн маанилүү аянтча болду.
Пленардык жыйындарда жана панелдик талкууларда Миң-Куштун туристтик, жаратылыш, тарыхый-маданий жана гастрономиялык мүмкүнчүлүктөрү каралды.
Президенттин Тоо күн тартиби боюнча атайын өкүлү Динара Кемелова бүгүнкү күндө Миң-Куш тургундар жана коноктор үчүн толугу менен коопсуз экенин белгилеп, аймакта жашыл экономика, айыл чарба жана туризмди өнүктүрүүгө чоң мүмкүнчүлүктөр бар экенин айтты.
Форумдун алкагында уран калдыктары жайгашкан аймактардагы калктуу конуштардын кызматташтыгын өнүктүрүүгө арналган өзүнчө тегерек стол да уюштурулду.
Катышуучулар уран калдыктары бар аймактарды Кыргызстандын жашыл экономикасынын жана туризм тармагынын жаңы өсүү чекиттерине айландыруу боюнча мамлекеттик органдардын, эл аралык уюмдардын жана жергиликтүү жамааттардын биргелешкен аракеттеринин маанилүүлүгүн белгилешти.
Форумга мамлекеттик органдардын өкүлдөрү, эл аралык уюмдар, туризм тармагынын өкүлдөрү, жарандык коом жана өлкөнүн ар кайсы аймактарынан келген катышуучулар катышты.
