Бишкекте ШКУ саммитине карата рейддик текшерүүлөр күчөтүлдү
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаменти Шанхай кызматташтык уюмунун (ШКУ) алдыдагы саммитине карата даярдык иштерин улантууда. Бул тууралуу ведомстводон билдиришти.
Анын алкагында Бишкек шаары боюнча мамлекеттик архитектура-курулуш контролдоо башкармалыгы №201 муниципалдык аймактык башкармалык менен биргеликте борбор калаада рейддик иш-чараларды өткөрүүдө.
Рейддердин негизги максаты — шаардагы көрктөндүрүү эрежелеринин сакталышын текшерүү, мыйзамсыз курулуштарды аныктоо жана көчөлөрдүн эстетикалык көрүнүшүн бузган объектилерге бөгөт коюу.
Текшерүүнүн жүрүшүндө Чыңгыз Айтматов көчөсүндөгү бир катар үйлөрдүн тургундарына түшүндүрүү иштери жүргүзүлдү. Адистер фасаддардын тазалыгын сактоо, муниципалдык жерлерди мыйзамсыз ээлебөө жана үй жанындагы аймактарды шаар куруу талаптарына ылайык келтирүү боюнча эскертүүлөрдү беришти.
Ошондой эле шаар аймагында мыйзамсыз кошумча курулуштарды орнотууга, санитардык талаптарды бузууга жана коомдук аймактарды ирээтсиз пайдаланууга жол берилбей турганы белгиленди.
