Быйыл өлкө боюнча каналдарга 657 миң чарчы метр бетон полотно төшөлөт
Өлкө боюнча ирригациялык каналдарга бетон полотно төшөө иштерин активдүү жүргүзүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Министрликтин маалыматына ылайык, 2025-жылы бул багытка республикалык бюджеттен 883,2 млн сом бөлүнгөн. Анын эсебинен жалпы аянты 342,57 миң чарчы метр болгон бетон полотно сатып алынып, 27,6 чакырым каналга 148,4 миң чарчы метр бетон жайылмасы төшөлгөн.
Ал эми 2026-жылы республика боюнча 657,4 миң чарчы метр бетон полотно төшөө пландалууда.
Бүгүнкү күнгө карата өлкө боюнча жалпы 107,4 миң чарчы метр бетон жайылмасы 21,9 чакырым аралыктагы каналдарга төшөлдү.
Аймактар боюнча көрсөткүчтөр төмөнкүдөй:
- Баткен облусунда — 7 миң чарчы метрден ашык бетон полотно 3,5 чакырым каналга;
- Ош облусунда — 16 миң чарчы метр 3,4 чакырымга;
- Жалал-Абад облусунда — 19,5 миң чарчы метр 3,88 чакырымга;
- Нарын облусунда — 6,9 миң чарчы метр 1,1 чакырымга;
- Талас облусунда — 11 миң чарчы метр 1,78 чакырымга;
- Ысык-Көл облусунда — 3,6 миң чарчы метр 0,9 чакырымга;
- Чүй облусунда — 43,2 миң чарчы метр 7,3 чакырым каналга төшөлдү.
Министрлик белгилегендей, бетон полотно төшөө суунун коромжусун азайтып, ирригациялык системалардын натыйжалуулугун жогорулатууга багытталган.
