Кыргыз адистери Бакуда осетр балыгын өстүрүү технологиясы менен таанышышты
21-22-май күндөрү Азербайжандын Баку шаарында Борбор Азия жана Кавказ аймагындагы Балык чарбасы жана аквакультура боюнча регионалдык комиссиясынын (CACFish) эксперттик жолугушуусу өттү. Бул тууралуу Айыл чарба министрлигинен билдиришти.
Иш-чара балык уулоо куралдарын колдонуу жана кармоолорду эсепке алуу боюнча маалыматтарды чогултуу системасын иштеп чыгууга арналды. Жолугушуу CACFish комиссиясынын 2025-2027-жылдарга карата иш программасынын алкагында уюштурулду.
Ага Суу ресурстары, айыл чарба жана кайра иштетүү өнөр жайы министрлигине караштуу Балык чарба комплекси департаментинин өкүлдөрү катышты.
Жолугушууда Кыргызстандын өкүлдөрү “Кыргыз Республикасында ички балык уулоодо маалыматтарды чогултуунун улуттук системасы” аттуу презентация жасап, өлкөдөгү балык чарбасынын учурдагы абалы, негизги балык уулоо куралдары жана тармактагы техникалык регламенттер тууралуу маалымат беришти.
Ошондой эле CACFish тарабынан каржыланып жаткан “Кыргыз Республикасында балык жана балык продукциясынын байкоо системасын иштеп чыгуу жана киргизүү” долбоорунун ишке ашырылышы тууралуу маалымат сунушталды.
22-май күнү делегация Биологиялык ар түрдүүлүктү коргоонун эл аралык күнүнө арналган форумга жана Каспий деңизин осетр балыктарынын чабактары менен балыктыруу иш-чарасына катышты.
Мындан тышкары, кыргызстандык адистер “Азербайжан” балык чарбасында осетр балыктарын өстүрүүнүн толук технологиясы менен таанышышты.
