Нарында курулуш ченемдерин бузган компанияга 200 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Нарын региондук башкармалыгы аймактагы курулуш объектилерин текшерүүнү улантууда.
Ведомствонун маалыматына ылайык, текшерүүнүн жүрүшүндө Кочкор районунун Кочкор айылындагы ичүүчү таза суу тутумун куруу объектинде техникалык регламенттердин, курулуш ченемдеринин жана эрежелеринин талаптары толук сакталбаганы аныкталды.
Маалыматка ылайык, мыйзам бузуулар курулуш объектисиндеги коопсуздук талаптарына жана аткарылып жаткан иштердин сапатына терс таасирин тийгизиши мүмкүн.
Анын негизинде курулуш иштерин жүргүзүп жаткан “Метаг Иншаат Тиджарет Аноним Ширкети” ЖЧКсына Кыргыз Республикасынын Бузуулар жөнүндө кодексинин 144-беренесине ылайык 200 миң сом айып салынды.Ошондой эле аныкталган кемчиликтерди жоюу боюнча тиешелүү көрсөтмөлөр берилди.
Мамлекеттик архитектура-курулуш контролдоо департаменти курулуш иштерин жүргүзгөн бардык тараптарды белгиленген талаптарды так сактоого чакырып, курулуш ченемдерин бузуу мыйзам чегинде жоопкерчиликке алып келерин эскертти.
