Баткенде “Согмент” чек ара посту ачылды
Баткен районунун Согмент айылында Чарбак тозотуна караштуу “Согмент” чек ара постунун ачылыш аземи болуп өттү. Бул тууралуу президенттин Баткен облусундагы өкүлчүлүгү билдирди.
Маалыматка ылайык, иш-чара чек арачылардын кесиптик майрамына карата уюштурулуп, өлкө боюнча бир катар чек ара объекттеринин пайдаланууга берилиши менен коштолду.
Ачылыш аземине Мамлекеттик чек ара кызматынын төрагасы Абдикарим Алимбаев онлайн форматта катышса, жеринен президенттин Баткен облусундагы өкүлү Мамыржан Рахимов баштаган жергиликтүү жетекчилер жана күч түзүмдөрүнүн өкүлдөрү болду.
Жетекчилер жаңы чек ара постунун ачылышы мамлекеттин коопсуздугун чыңдоодогу маанилүү кадам экенин белгилеп, чек арачыларга мамлекет тарабынан өзгөчө көңүл бурулуп жатканын айтышты.
Жаңы постто аскер кызматкерлеринин сапаттуу кызмат өтөөсү үчүн бардык заманбап талаптарга жооп берген казарма курулуп, тиешелүү шарттар түзүлгөн.
Белгиленгендей, “Согмент” чек ара постунун кызматкерлери кыргыз-өзбек мамлекеттик чек арасынын 12 чакырымдан ашык тилкесин көзөмөлдөйт.
