Бишкектин Кашка-Баш айылына 750 орундуу мектеп салынууда
Президент Садыр Жапаровдун тапшырмасы менен Бишкек шаарына караштуу Кашка-Баш айылында 750 орундуу заманбап мектеп курулууда. Бул тууралуу Курулуш министрлигинен билдиришти.
Маалыматка ылайык, билим берүү мекемесинин курулушу үстүбүздөгү жылдын февраль айында башталган. Учурда имараттын үчүнчү кабатынын колонналары орнотулууда.
Долбоор Курулуш министрлиги тарабынан ишке ашырылып, республикалык бюджеттен каржыланууда. Башкы план боюнча мектептин жалпы аянты 8234 чарчы метрди түзүп, заманбап талаптарга ылайык салынат.
Ошондой эле курулуш иштеринин сапаты жана ар бир этабы тиешелүү департаменттер тарабынан көзөмөлдөнүп жатканы белгиленди.
Мектеп пайдаланууга берилгенден кийин эки нөөмөт менен 1500дөн ашык окуучуга билим алууга мүмкүнчүлүк түзүлөт.
