Өлкөдө үч айда 4 миң тоннадан ашык балык өндүрүлдү
2026-жылдын I кварталынын жыйынтыгы менен Кыргызстанда товардык балык өндүрүүнүн көлөмү 4029,1 тоннаны түздү. Учурда республика боюнча 545 балык чарбасы иш алып барууда.
Айыл чарба министрлигинин маалыматына ылайык, балык чарбачылыгы агрардык сектордогу туруктуу өнүгүп жаткан артыкчылыктуу багыттардын бири болуп саналат. Тармакты өнүктүрүү максатында аквакультураны кеңейтүү, заманбап өндүрүш ыкмаларын жайылтуу, ички рынокту сапаттуу продукция менен камсыз кылуу жана экспорттук мүмкүнчүлүктөрдү жогорулатуу боюнча иштер жүргүзүлүүдө.
Аймактар боюнча өндүрүш көрсөткүчтөрү төмөнкүчө болду:
- Чүй облусу — 2206,7 тонна, 398 чарба;
- Жалал-Абад облусу — 962,2 тонна, 39 чарба;
- Ысык-Көл облусу — 311,4 тонна, 48 чарба;
- Нарын облусу — 243,5 тонна, 34 чарба;
- Талас облусу — 195,1 тонна, 15 чарба;
- Ош облусу — 110,2 тонна, 11 чарба.
Өндүрүш көлөмү боюнча Чүй облусу лидерликти сактап келсе, Жалал-Абад облусунда дагы балык чарбачылыгынын өсүү динамикасы байкалууда.
Министрлик мындан ары да тармактын инфраструктурасын жакшыртуу, жаңы технологияларды киргизүү, инвестиция тартуу жана өндүрүш кубаттуулугун кеңейтүү иштерин улантарын билдирди.
Адистердин айтымында, бул аракеттер азык-түлүк коопсуздугун камсыздоого, жаңы жумуш орундарын түзүүгө жана өлкөнүн экспорттук потенциалын жогорулатууга өбөлгө түзөт.
