Өсүмдүктөрдүн карантин лабораториялары 4 айда 1,3 млн сом тапты
Быйылкы жылдын алгачкы төрт айында өсүмдүктөрдүн карантини боюнча лабораторияларга жалпы 7965 үлгү түшүп, 18 848 экспертиза жүргүзүлдү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, лабораторияларга импорттук продукциялардан 5559, экспорттук продукциялардан 1767 үлгү кабыл алынган. Мындан тышкары, изилдөө иштеринен 379 жана жарандардын кайрылуулары боюнча 260 үлгү текшерүүгө алынган.
Жүргүзүлгөн лабораториялык изилдөөлөрдүн жыйынтыгында өсүмдүктөрдүн карантини боюнча кызматтар 1 миллион 358 миң сомдон ашуун каражат тапкан.
Ал эми 2025-жылдын жыйынтыгы боюнча лабораторияларга 21 209 үлгү түшүп, жалпы 48 791 экспертиза жүргүзүлгөн. Анын негизинде 5 миллион 635 миң сомдон ашык каражат түшкөнү маалымдалды.
Адистер белгилегендей, мындай текшерүүлөр айыл чарба продукцияларындагы карантиндик зыянкечтерди өз убагында аныктоого жана коопсуз продукцияны камсыздоого багытталган.
