Чүйдөгү “Манас” соода-логистикалык шаарынын курулушу текшерилди
Курулуш, архитектура жана турак жай-коммуналдык чарба министри Нурдан Орунтаев Чүй облусунун Аламүдүн районуна караштуу Достук айылында курулуп жаткан "Манас" соода-логистикалык шаарынын курулуш аянтын жана долбоорун жеринен көрүп чыкты.
Ведомствонун маалыматына ылайык, улуттук инвестициялык долбоордун курулушу 2026-жылдын 1-майында башталган. Долбоор көп функционалдуу комплексти камтып, бир нече этап менен ишке ашырылат.
Биринчи этапта 11 кабаттуу төрт көп батирлүү турак жай, эки кабаттуу бир нече турак жай имараттары, мейманкана, ошондой эле соода жана бизнес борборлорунун курулушу каралган. Кийинки этаптарда логистикалык кампаларды жана башка инфраструктуралык объектилерди куруу пландалууда.
Долбоорду "Хунан Курулуш Инвестициялык" тобу ишке ашырып жатса, буйрутмачы катары "Кыргыз-кытай инвестициялык холдинг" ЖЧКсы чыгууда.
Текшерүүнүн жүрүшүндө компаниянын эсептик эсебинде 6 миллион АКШ доллары өлчөмүндөгү каражат бар экени аныкталды.
Министр Нурдан Орунтаев курулуш иштеринин ар бир этабында сапатты камсыздоого, коопсуздук талаптарын так сактоого жана белгиленген мөөнөттөрдү бузбоого өзгөчө көңүл буруу керектигин белгиледи.
Ошондой эле Курулуш министрлиги тарабынан турак жайларды курулуштун алгачкы баскычында сатууга жана жарнамалоого жол берилбей турганы эскертилди. Турак жай объектилери кеминде 3–4 кабатка чейин курулгандан кийин гана сатыкка чыгарылышы керектиги белгиленди.
Мындан тышкары, курулуш компаниясына курулуш иштерин ыкчам жүргүзүү, каржылык каражаттар боюнча ачык-айкын маалымат берүү жана мыйзам талаптарына ылайык уставдык капиталды толуктоо боюнча тапшырмалар берилди.
