Мамлекеттик бажы кызматы "Ак-Маралда" жаңы эс алуу корпусун курат
29-майда Министрлер Кабинетине караштуу Мамлекеттик бажы кызматынын жетекчилиги Ысык-Көл облусундагы "Ак-Марал" эс алуу борборунун жаңы корпусунун курулушуна старт берип, убакыт капсуласын салды. Бул тууралуу Бажы кызматынан билдиришти.
Иш-чарага Мамлекеттик бажы кызматынын борбордук аппаратынын түзүмдүк бөлүмдөрүнүн жана аймактык бажы органдарынын жетекчилери, ошондой эле "Мамлекеттик бажы инфраструктурасы" ААКнын өкүлдөрү катышты.
Долбоорго ылайык, жалпы аянты 3900 чарчы метрден ашкан беш кабаттуу жаңы корпус курулат. Имарат эс алуучулар үчүн заманбап шарттар менен жабдылып, комплекстин аймагында термалдык бассейндер да курулат.
Белгилей кетсек, долбоор республикалык бюджеттен каражат тартпастан, "Мамлекеттик бажы инфраструктурасы" ААК тарабынан бажыга байланышкан кызмат көрсөтүүлөрдөн түшкөн кирешелердин эсебинен каржыланат.
Мындан тышкары, көчмө кеңешменин жүрүшүндө Электрондук декларациялоо борборун ишке киргизүүгө даярдык маселелери талкууланды. Катышуучулар "Смарт Бажы" маалыматтык системасынын алкагында декларациялоо блогун иштеп чыгуунун жүрүшүн жана борборду ишке киргизүү үчүн зарыл болгон уюштуруу чараларын карап чыгышты.
Жыйынтыгында Мамлекеттик бажы кызматынын жетекчилиги инфраструктуралык долбоорлорду жана санариптик демилгелерди өз мөөнөтүндө ишке ашыруу боюнча тиешелүү тапшырмаларды берди.
