Шылуундар Салык кызматынын атынан жасалма билдирүүлөрдү таратууда
Мамлекеттик салык кызматы акыркы убакта өздөрүн мекеменин кызматкерлери же жетекчилиги катары тааныштырган шылуундардын аракеттери көбөйгөнүн эскертип, жарандарды сак болууга чакырды. Бул тууралуу Салык кызматынан билдиришти.
Маалыматка ылайык, алдамчылар телефон аркылуу байланышып, ошондой эле WhatsApp, Telegram жана башка социалдык тармактар менен мессенджерлер аркылуу билдирүүлөрдү жөнөтүүдө. Айрым учурларда алар жасалма интеллект технологияларын колдонуу менен өздөрүн Салык кызматынын жетекчилиги катары көрсөтүп, мыйзамсыз талаптарды коюшууда.
Мындан тышкары, шылуундар салык карыздары же милдеттенмелери тууралуу жасалма билдирүүлөрдү таратып, аларды расмий маалымат катары көрсөтүүгө аракет кылышууда.
Мамлекеттик салык кызматы расмий билдирүүлөр жарандарга почта аркылуу же "Салык төлөөчүнүн жеке кабинети" аркылуу гана жөнөтүлөрүн белгиледи. Ошондой эле мекеме WhatsApp, Telegram жана башка мессенджерлер аркылуу билдирүү жөнөтпөй турганын жана кызматкерлер жеке эсептерге акча которууну талап кылбай турганын эскертти.
Жарандарга шектүү шилтемелерди ачпоого, жеке маалыматтарын, сырсөздөрүн, SMS-коддорун жана банктык реквизиттерин эч кимге бербөөгө чакырык жасалды. Шектүү билдирүүлөр келип түшкөн учурда маалыматты аймактык салык органдарынан тактоо же 116 кыска номерине кайрылуу сунушталат.
Салык кызматы салыктык карыздарды текшерүү жана төлөмдөрдү жүргүзүү "Салык төлөөчүнүн жеке кабинети" же банктардын расмий мобилдик тиркемелери аркылуу гана ишке ашырылышы керектигин эске салды.
Мекеме жарандарды алдамчылардын айла-амалдарына алданбоого жана шектүү кайрылуулар тууралуу дароо укук коргоо органдарына маалымдоого чакырды.
