Бишкек - Балыкчы багытына жүргүнчүлөрдү ташуучу поезддин жайкы каттамы башталат
2026-жылдын 5-июнунан тартып Бишкек – Балыкчы багыты боюнча жүргүнчү поездинин жайкы сезондогу каттамы жанданат. Бул тууралуу “Кыргыз темир жолу” мамлекеттик ишканасынан маалымдашты.
Билдирүүгө ылайык, поезд 5-июндан 21-июнга чейин жума, ишемби жана жекшемби күндөрү каттаса, 26-июндан 13-сентябрга чейин күн сайын каттамын аткарат.
Поезд Бишкек-2 темир жол бекетинен саат 08:06да жөнөп, Балыкчы шаарына саат 12:12де жетет. Ал эми “Балыкчы пляж” токтоочу пунктуна саат 12:37де келет.
Ал эми кайтар жолдо поезд “Балыкчы пляж” бекетинен саат 18:40та чыгып, Балыкчы бекетине саат 19:00дө келет. Бишкек-2 бекетине келүү убактысы – саат 23:11 болот.
Белгилей кетсек, Бишкек-2 темир жол бекети Бишкек шаарындагы Эркиндик бульвары, 1А дарегинде жайгашкан.
Жайкы туристтик сезондун башталышы менен бул каттам борбордон Ысык-Көлгө барууну каалаган жүргүнчүлөр үчүн ыңгайлуу транспорттук мүмкүнчүлүк түзөт.
