Жалал-Абадда ири мамлекеттик долбоорлор ишке ашырылууда
Президенттин өзгөчө тапшырмалар боюнча атайын өкүлү Бакыт Төрөбаев Мамлекет башчысы Садыр Жапаров тарабынан өзгөчө көзөмөлгө алынган Жалал-Абад облусундагы стратегиялык объектилердин курулушу менен таанышты.
Президенттик админстрациянын маалыматтык саясат бөлүмүнүн айтымында, бүгүнкү күндө курулуш иштерине тоскоолдук жараткан көйгөйлөр жок, каржылоо үзгүлтүксүз жүргүзүлүп, жумушчулардын эмгек акысы өз убагында төлөнүүдө. Бул өз кезегинде курулуштун сапаттуу жана мөөнөтүндө аякташына негиз түзүүдө.
Алдыңкы долбоорлордун бири болгон Жалал-Абад аэропорту өлкөнүн транспорттук инфраструктурасын өнүктүрүүдөгү маанилүү объект болуп саналат. Учурда терминалдын курулушу жана учуп-конуу тилкесин асфальттоо иштери активдүү жүргүзүлүүдө.
Терминал 2026-жылдын күз айларында бүткөрүлүп, ал эми аэропортту толук пайдаланууга берүү 2027-жылга пландалууда. Бул долбоор аймактын инвестициялык жана туристтик мүмкүнчүлүктөрүн кеңейтүүгө, ошондой эле калк үчүн транспорттук жеткиликтүүлүктү жакшыртууга салым кошот.
Ошону менен катар, 400 орундуу Президенттик “Акылман” лицейинин курулушу да жогорку темпте уланууда. Билим берүү комплекси 2026-жылдын жай мезгилинде бүткөрүлүп, жаңы окуу жылына даяр абалда пайдаланууга берилет. Лицей заманбап спорт зал, бассейн, окуучулар үчүн жатакана жана мугалимдер үчүн кызматтык батирлер менен камсыздалып, өлкөдөгү алдыңкы билим берүү борборлорунун бири болууга багытталган.
Саламаттык сактоо тармагында дагы бир ири долбоор ишке ашырылууда. Жүрөк-кан тамыр ооруларына адистешкен хирургиялык оорукананын курулушу бүгүнкү күндө 60% аяктады. Жалпы наркы 3 млрд сомду түзгөн бул медициналык мекеме 2027-жылы пайдаланууга берилет. Оорукана заманбап жабдуулар менен камсыздалып, жогорку квалификациялуу адистер тартылат. Натыйжада калкка көрсөтүлүүчү медициналык кызматтардын сапаты жаңы деңгээлге көтөрүлөт.
Жалпысынан, аэропорттун, билим берүү комплексинин жана адистештирилген оорукананын курулушу мамлекеттин аймактарды өнүктүрүү, билим берүү менен саламаттык сактоонун сапатын жогорулатуу жана жарандардын жашоо деңгээлин жакшыртуу багытындагы ырааттуу саясатынын айкын көрүнүшү болуп саналат.
