Бостериде курулуш талаптарын бузган компания 235 миң сом айыпка жыгылды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ысык-Көл региондук башкармалыгы тарабынан Бостери айылындагы курулуш объектилерине текшерүү жүргүзүлдү.
Текшерүүнүн жүрүшүндө Карагай курортунун курулушунда бир катар мыйзам бузуулар аныкталган. Атап айтканда, темир-бетон конструкцияларын курууда бекитилген долбоордук чечимдер сакталбаганы жана дубал конструкцияларынын сапатына коюлган талаптар бузулганы белгиленди.
Маалыматка ылайык, бул фактылар шаар куруу жана курулуш ченемдеринин талаптарын одоно бузуу катары бааланган.
Анын негизинде курулуш иштерин жүргүзүп жаткан "Бай Сервис Девелопмент" ЖЧКсына карата Кыргыз Республикасынын Укук бузуулар кодексине ылайык 235 миң сом өлчөмүндө айып салынды. Ошондой эле аныкталган кемчиликтерди жоюу боюнча милдеттүү көрсөтмөлөр берилди.
