Экология тармагына санарип башкаруунун жаңы ыкмалары киргизилет
Жаратылыш ресурстары, экология жана техникалык көзөмөл министрлигинин демилгеси менен регионалдык башкармалыктардын адистери үчүн квалификацияны жогорулатууга багытталган масштабдуу окуу семинары башталды.
Министрликтин маалыматына ылайык, иш-чаранын негизги максаты — аймактардагы адистердин кесиптик деңгээлин жогорулатуу, экологиялык көзөмөлдү санариптештирүү жана жаратылышты коргоо системасына заманбап башкаруу ыкмаларын киргизүү.
Катышуучулар мамлекеттик экологиялык экспертизаны жүргүзүү, калдыктар жана саркынды суулар боюнча ченемдик укуктук актыларды талдоо, ошондой эле автоматташтырылган маалыматтык системалар менен иштөө боюнча билим алышууда.
Мындан тышкары, жаныбарлар жана өсүмдүктөр дүйнөсүнүн объекттерин пайдаланууга уруксат берүү тартиби да каралууда.
Окутуу теориялык жана практикалык бөлүктөрдү камтып, катышуучулар реалдуу кейстер менен иштөө аркылуу санариптик көндүмдөрүн бекемдешет.
Министрлик бул демилге аймактардагы экологиялык көзөмөлдүн сапатын жогорулатууга жана өлкөдөгү экологиялык коопсуздукту камсыздоого өбөлгө болорун белгиледи.
