Чүйдө мыйзамсыз таштанды төккөндөргө 46 миң сом айып салынды
Чүй облусунда айлана-чөйрөнү коргоо мыйзамдарынын талаптарын бузуу фактылары аныкталды. Тактап айтканда, жарандар тарабынан таштандыларды уруксат берилбеген жерлерге таштоо учурлары катталган.
Аталган мыйзам бузуулар боюнча Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын кызматкерлери тарабынан эки административдик протокол түзүлүп, жалпы суммасы 46 миң сом өлчөмүндө айып пул салынды.
Министрликтин маалыматына ылайык, айлана-чөйрөнү коргоо боюнча мыйзамдардын сакталышын камсыздоо максатында рейддик иш-чаралар өлкөнүн бардык аймактарында туруктуу негизде жүргүзүлүүдө. Бул иштер жаратылышты коргоого, санитардык тазалыкты сактоого жана экологиялык коопсуздукту камсыз кылууга багытталган.
Ошондой эле мыйзам бузуу фактылары аныкталган учурда күнөөлүү тараптарга карата мыйзам чегинде 23 миң сомго чейин айыптык чаралар колдонулушу мүмкүн.
Жарандар айлана-чөйрөгө жоопкерчилик менен мамиле кылууга жана таштандыларды атайын белгиленген жайларга гана төгүүгө чакырылат.
