Таласта мыйзамсыз иштеген май куюучу жайга 200 миң сом айып салынды

Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Талас региондук башкармалыгы аймактагы курулуш объектилерин көзөмөлдөө иштерин улантууда.

Ведомстводон билдиришкендей, жергиликтүү тургундардын арызынын негизинде Талас районуна караштуу Чыңгыз Айтматов көчөсүндөгү №388 жана №392 даректерде жайгашкан “Сардалбек” жана “Партнер Нефть” май куюучу жайларында пландан тышкары текшерүү жүргүзүлгөн.

Текшерүүнүн жыйынтыгында “Партнер Нефть” май куюучу жайындагы газ куюучу станция тиешелүү уруксат берүүчү документтерсиз курулуп, мыйзамсыз иш жүргүзүп жатканы аныкталган. Бул аракеттер Кыргыз Республикасынын “Шаар куруу жана архитектура жөнүндө” мыйзамынын талаптарын бузуу катары бааланган.

Ошондой эле Мамлекеттик санитардык-эпидемиологиялык көзөмөл борбору менен биргеликте жүргүзүлгөн текшерүүдө “Сардалбек” май куюучу жайында санитардык нормалар толук сакталбаганы белгилүү болгон.

Натыйжада, “Партнер Нефть” ишканасына карата Кыргыз Республикасынын Укук бузуулар жөнүндө кодексинин 144-беренесинин негизинде 200 миң сом өлчөмүндө айып пул салынып, мыйзам бузууларды жоюу боюнча көрсөтмө берилди.

Ал эми “Сардалбек” май куюучу жайына санитардык талаптарды сактоо боюнча эскертүү берилген.