Кара-Көл шаарынын мурдагы мэри кармалды
УКМК мамлекеттик жана муниципалдык органдардагы жана мекемелердеги коррупцияга каршы күрөшүү иш-чараларынын алкагында Жалал-Абад облусунун Кара-Көл шаарындагы социалдык объекттин курулушунда мыйзам бузууларга жол берилген фактыларды аныктады.
УКМКнын маалымат кызматынын айтымына караганда, Кара-Көл шаарынын мэриясынын кызмат адамдары тарабынан 2024–2025-жылдары Кара-Көл шаарынын 7-кичирайонунда шаардагы турак жайга муктаж болгон 32 үй-бүлөнүн жашоосуна ылайыкталган көп батирлүү турак үйдүн курулушу аяктаган.
Аталган объект мурда Кара-Көл шаарынын мэриясынын балансында болуп, пайдаланууга жараксыз абалда тургандыктан көп убакыт пайдаланылбай келген.
Тактап айтканда, курулуш жана жасалгалоо иштерине тендер өткөрүү тартибинде, ошондой эле курулуш нормалары жана эрежелери боюнча көзөмөлдөөдө жана атайын техникалык корутундуларды даярдоодо мыйзам бузууларга жол берилген.
Текшерүүнүн жыйынтыгында мамлекеттик бюджетке 9 миллион 985 миң 400 сом өлчөмүндө зыян келтирилгени аныкталды.
Чогултулган материалдардын негизинде (кызмат абалынан кыянаттык менен пайдалануу) боюнча кылмыш иши козголуп, анын алкагында төмөнкү адамдар кармалды: О.Н.О. – Кара-Көл шаарынын мурдагы мэри, К.М.С. – Кара-Көл шаарынын мэриясынын муниципалдык менчик башкармалыгынын мурдагы башчысы, М.А.А. – Кара-Көл шаарынын мэриясынын муниципалдык менчик башкармалыгынын курулуш боюнча мурдагы адиси, И.М.А. – курулуш иштерине техникалык көзөмөл жүргүзүүгө жооптуу адис.
Аталган адамдар УКМКнын тергөө абагынын убактылуу кармоочу жайына киргизилди.
