Кара-Сууда 12 айылды камтыган таза суу тутуму ишке берилди
18-июнда Министрлер кабинетинин төрагасынын орун басары Эрлист Акунбеков Ош облусуна болгон иш сапарынын алкагында Кара-Суу районундагы "Отуз-Адыр" чакан долбоорунун негизинде ичүүчү суу менен камсыздоо тутумун пайдаланууга берүү аземине катышты.
Долбоор Отуз-Адыр жана Савай-Арык айыл аймактарындагы 12 калктуу конушту камтып, жалпы 30 миңге жакын тургунду сапаттуу ичүүчү суу менен камсыздоого багытталган. Анын негизинде Октябрь айылында көлөмү 300 куб метр болгон суу сактагыч курулду. Ошондой эле 11,4 чакырым суу түтүктөрү тартылып, объекттин санитардык-коргоо аймагы тосулду.
Суу ресурстары айыл чарба жана кайра иштетүү өнөр жайы министри Эрлист Акунбеков калкты сапаттуу суу менен камсыз кылуу мамлекеттик саясаттын артыкчылыктуу багыты экенин белгилеп, долбоор аймактагы жашоо шартын жакшыртууга жана инфраструктуранын ишенимдүүлүгүн арттырууга өбөлгө түзөрүн айтты.
"Асилия" балдар бакчасынын директору Гүлкан Жунусова долбоордун натыйжасында билим берүү мекемесиндеги шарттар кыйла жакшырганын белгиледи.
Анын айтымында, 205 бала тарбияланган бакчада буга чейин таза суу менен камсыздоодо көйгөйлөр болуп келген. Учурда имараттын эки кабатындагы бардык санитардык түйүндөргө таза суу киргизилип, балдар үчүн даараткана, кол жуучу жана идиш жууй турган жайлар жаңыланды.
Кара-Дөбө айылынын тургуну Токтокан Исмайылованын айтымында, айыл тургундары да көп жылдан бери таза суу маселесинен кыйналып келген.
"Акчалуулар үйүнө сууну өз алдынча ар жерден улап киргизип алышкан. Ал эми кээ бирлери кудук колдонушат. Көпчүлүк эл болсо тамдарына эски түтүктөрдөн суу алып кирген. Бирок бирде жарылып кетип, бирде суу келбей, үзгүлтүккө учурап турган. Ошондуктан бул долбоор биздин айыл үчүн абдан маанилүү. Эми ар бир үй-бүлөгө таза суу жетет деп күтүп жатабыз", — деди ал.
Ал эми М.Жаманкулов атындагы жалпы билим берүү мектебинин уюштуруучу завучу Тамара Эргешованын айтымында, долбоордун алкагында мектепте окуучулар үчүн заманбап кол жуучу жайлар орнотулуп, санитардык-гигиеналык шарттар жакшыртылган.
"Мурда мектептин ичинде таза суу жок болчу. Азыр окуучулар үчүн жакшы шарттар түзүлдү. Мындан тышкары санитардык-гигиена боюнча атайын семинарлар өткөрүлдү", — деди ал.
Белгилей кетсек, жалпы наркы 541,7 млн сомду түзгөн таза суу долбоору Министрлер кабинети, Дүйнөлүк банк, ошондой эле АРИСтин колдоосу менен ишке ашырылды.
