Кыргыз-Ата айыл аймагынын калкы сапаттуу ичүүчү суу менен камсыз болду
Ош облусунун Ноокат районундагы Кыргыз-Ата айыл аймагында Дүйнөлүк Банк каржылаган "Айылдык суу менен камсыздоо жана санитарияны туруктуу өнүктүрүү" долбоорунун алкагында ичүүчү суу тутуму жаңыланып, ишке берилди.
Долбоор Кыргыз-Ата, Ак-Булак жана Борко айылдарын камтып, 22 миң 500дөн ашык тургунду сапаттуу ичүүчү суу менен камсыз кылууга багытталган.
Мурда бул аймакта суу түтүктөрү эскирип, тармактын көп бөлүгү иштен чыккан. Жалпы узундугу 12 чакырымга жакын болгон эски системанын мүмкүнчүлүгү чектелип, калктын болгону 20%га жакыны гана туташуу аркылуу суу алган.
Курулуш иштери 2017-жылдын августунда башталып, негизги бөлүгү 2019-жылдын башында аяктаган. Кийинки толуктоочу иштер 2020-жылдын аягына чейин уланган. Долбоордун жалпы наркы 248 миллион сомдон ашып, алты бөлүккө бөлүнүп жүзөгө ашырылган.
Долбоордун жыйынтыгында айыл аймагында муниципалдык суу ишканасы түзүлүп, жаңыланган тутумду башкаруу жана тейлөө иши ошол мекемеге жүктөлдү.
Бул долбоор айыл тургундарын таза суу менен үзгүлтүксүз камсыз кылып, жашоо сапатын жогорулатууга жана аймактын туруктуу өнүгүшүнө шарт түзөрү белгиленди.
