Ысык-Көлдөн 300 метр тор жана таштанды чыгарылды
Ысык-Көл районунун Григорьевка, Кожояр, Семеновка жана Корумду айылдарынын аймагында кезектеги рейддик иш-чара өткөрүлдү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, рейд министрликке караштуу Экологиялык жана техникалык көзөмөл кызматынын тескөөчүлөрү тарабынан жүргүзүлгөн. Рейддин жыйынтыгында көлдөн мыйзамсыз салынган 300 метр синтетикалык балык уулоочу тор табылып, суудан чыгарылды.
Ошондой эле көлдүн жээгинен 30 килограммга жакын ар кандай тиричилик калдыктары жана акыр-чикирлер тазаланды.
Текшерүү учурунда тескөөчүлөр жергиликтүү тургундарга жана эс алуучуларга балык уулоо эрежелерин сактоо, тыюу салынган торлорду колдонбоо жана экологияга аяр мамиле кылуу боюнча түшүндүрүү иштерин жүргүзүштү.
