Байтик айылында жаңы таза суу системасы курулууда
Аламүдүн районуна караштуу Байтик айылында заманбап таза суу тутумун куруу боюнча иштер кызуу жүрүп жатат. Долбоор айыл тургундарын сапаттуу жана үзгүлтүксүз таза суу менен камсыздоого багытталган. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Долбоордун алкагында жалпы узундугу 7 миң метр болгон ички суу түтүктөрү тартылып бүттү. Ошондой эле суу менен камсыздоо тутуму үчүн жалпы көлөмү 11 куб метр болгон темир-бетон кудуктар орнотулду.
Мындан тышкары, насостук жабдууларды электр энергиясы менен камсыздоо үчүн 160 кВт кубаттуулуктагы жаңы трансформатордук көмөкчордон пайдаланууга берилди. Ал эми жолдордун алдынан суу түтүктөрүн өткөрүү үчүн 30,4 метр узундуктагы болот түтүк-футлярлар орнотулду.
Маалыматка ылайык, долбоор аяктагандан кийин Байтик айылындагы көп жылдан берки таза суу көйгөйүн чечүүгө мүмкүнчүлүк түзүлөт.
