Караколдогу эки объектке 200 миң сомдон айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ысык-Көл региондук башкармалыгы Каракол шаарындагы курулуш объектилерин текшерүү учурунда мыйзам бузууларды аныктады.
Министрликтин маалыматына ылайык, Алыбеков көчөсү, 136 дарегинде жайгашкан балдар дүкөнүндө долбоордук-уруксат берүүчү документтери жок темир конструкциядан кошумча курулуш жүргүзүлгөн.
Ал эми Жусаев көчөсү, 198 дарегиндеги металл кабыл алуу пункту тиешелүү уруксат берүүчү документтерсиз пайдаланылып жатканы белгилүү болгон.
Жыйынтыгында жооптуу тараптарга Кыргыз Республикасынын Укук бузуулар жөнүндө кодексинин негизинде протокол түзүлүп, ар бирине 200 миң сомдон айып пул салынды. Ошондой эле мыйзам бузууларды белгиленген мөөнөттө жоюу боюнча милдеттүү көрсөтмөлөр берилди.
