Кыргызстан менен Орусия эмгек миграциясынын жаңы механизмдерин талкуулады
Эмгек, социалдык камсыздоо жана миграция министрлигинде Кыргызстандын жетекчилиги менен Россия Федерациясынан келген өкүлчүлүктүү делегациянын жолугушуусу өттү.
Министрликтин маалыматына ылайык, жолугушууда эмгек миграциясын жөнгө салуу, жарандарды кесиптик даярдоо, ошондой эле мигранттардын социалдык жана маданий адаптациясын камсыз кылуу маселелери талкууланды.
Министрдин биринчи орун басары Камчыбек Досматов эки өлкөнү бекем достук жана стратегиялык өнөктөштүк байланыштырып турарын белгилеп, министрликтин башкы артыкчылыгы чет өлкөгө иштөөгө кеткен кыргызстандыктардын коопсуздугун, укуктук жактан корголушун жана кесиптик даярдыгын камсыз кылуу экенин айтты.
Жолугушууда жарандарды жумушка орноштуруунун мыйзамдуу жана ачык-айкын механизмдерин түзүү, көмүскө ортомчуларды четтетүү, ошондой эле Орусиядагы ишенимдүү иш берүүчүлөр менен Кыргызстандын квалификациялуу адистеринин ортосунда түз байланыш түзүү маселелерине өзгөчө көңүл бурулду.
Ошондой эле жарандык коомдун, Соода-өнөр жай палаталарынын, квалификацияны баалоо борборлорунун жана билим берүү платформаларынын кызматташтыгы эмгек миграциясынын сапатын жогорулатууга жардам берери белгиленди.
Жолугушуунун практикалык бөлүгү министрликке караштуу Чет өлкөлөрдө жарандарды ишке орноштуруу борборунда уланып, тараптар мыйзамдуу эмгек миграциясын өнүктүрүү боюнча биргелешкен иш-чараларды талкуулашты.
Жыйынтыгында тараптар эки өлкөнүн экономикасына жана жарандарына пайда алып келе турган практикалык долбоорлорду биргелешип ишке ашырууга даяр экенин билдиришти.
