Бишкек менен Чанша шаардык инфраструктураны өнүктүрүүдө тажрыйба алмашат
Бишкек шаарында борбор калаанын жетекчилиги Кытайдын Чанша шаарынын делегациясы менен жолугушуп, боордош шаарлар мамилесин түзүү жана шаарларды өнүктүрүү жаатындагы кызматташтыкты кеңейтүү маселелерин талкуулады.
Мэриянын маалыматына ылайык, жолугушууга Бишкек шаарынын мэринин биринчи орун басары Кубанычбек Иманалиев жана Чанша шаарынын Элдик өкмөтүнүн Тышкы иштер боюнча канцеляриясынын директорунун орун басары Дуань Хайбо жетектеген делегация катышты.
Жолугушууда шаардык чарбаны өнүктүрүү, көрктөндүрүү, жашылдандыруу жана айлана-чөйрөнү коргоо багытындагы кызматташтык маселелерине өзгөчө көңүл бурулду.
Ошондой эле тараптар муниципалдык башкарууну санариптештирүү, "акылдуу шаар" технологияларын киргизүү, шаардык инфраструктураны өнүктүрүү жана инвестициялык кызматташтыкты кеңейтүү боюнча биргелешкен долбоорлордун келечегин талкуулашты.
Бишкек шаарынын өкүлдөрү борбор калаа эл аралык кызматташтыкты кеңейтүүгө кызыкдар экенин белгилешсе, Чанша шаарынын делегациясы Бишкекте акыркы жылдары ишке ашырылып жаткан өзгөрүүлөргө жана шаардык инфраструктуранын өнүгүшүнө оң баа берди.
Жолугушуунун жыйынтыгында эки тарап Бишкек менен Чанша шаарларынын ортосунда боордош шаарлар мамилесин түзүү боюнча ишти улантууга, ошондой эле өз ара кызыкчылык жараткан багыттарда практикалык кызматташууну кеңейтүүгө даяр экенин билдиришти.
