Бишкекте көрктөндүрүү талаптарын бузган бир катар курулуштар токтотулду
Бишкек шаарында курулуш аянтчаларында коопсуздук жана көрктөндүрүү талаптарынын аткарылышын текшерүү боюнча жүргүзүлгөн рейддин жыйынтыгында бир нече курулуш объектисинде мыйзам бузуулар аныкталып, алардын курулуш-монтаждоо иштери убактылуу токтотулду.
Курулуш, архитектура жана турак жай-коммуналдык чарба министри Нурдан Орунтаевдин “Курулуш объекттерин ишке ашырууда аймактарды көрктөндүрүүнү камсыз кылуу жөнүндө” буйругунун аткарылышын көзөмөлдөө максатында Бишкек шаарындагы курулуш объекттеринде рейддик текшерүү жүргүзүлүүдө.
Текшерүүнүн жүрүшүндө бир катар объекттерде курулуш аянтчалары талаптагыдай тосулбаганы, жөө жүргүнчүлөрдүн коопсуздугу үчүн коргоочу тосмолор жана чатырчалар орнотулбаганы, сырткы жарыктандыруу камсыздалбаганы, кирүүчү жолдор даярдалбаганы жана курулуш техникасынын дөңгөлөктөрүн жуучу жайлар уюштурулбаганы аныкталды.
Мыйзам бузуулар Бакаев, Репин, М. Абдраев, Ак-Шыйрак, Жайыл-Баатыр, Гагарин, Ветеринар, Магистраль, Курултай, Арча-Бешик, Масалиев, Уметалиев, М. Сагынбай көчөлөрүндө, ошондой эле Жал кичи районунда курулуп жаткан турак жайлар, кеңселер, мейманканалар жана ресторандарда катталган.
Текшерүүнүн жыйынтыгында "Элемент Стиль" ЖЧКсына 200 миң сом айып пул салынып, кемчиликтер толук жоюлганга чейин курулуш-монтаждоо иштерин жүргүзүүгө тыюу салынды.
Мындан тышкары, "Имарат Восток", "Тайлак Строй", "КомСтройСервис", "Алим Строй", "КН Гранд Строительства", "Мурас Курулуш Групп", "Старт Компани", "Масшер Билдинг", "Алип Строй", "Мерибелл Текстиль Иншаат", "Битрейд Импекс", "Бостон Строй", "Дрим Хаус", "Ынтымак Биримдиги", "Бак-Строй-Талас", "ТК Мегаприм" жана "Сантехмонтаж" компанияларына мыйзам бузууларды жоюу боюнча көрсөтмөлөр берилип, талаптар аткарылганга чейин алардын курулуш-монтаждоо иштери да убактылуу токтотулду.
Мамлекеттик архитектура-курулуш контролдоо департаменти курулуш иштерин жүргүзүүдө КР КЧ 12-02:2018 "Курулуш өндүрүшүн уюштуруу" талаптарын так сактоо милдеттүү экенин эскертип, белгиленген нормалар аткарылмайынча курулуш иштерине уруксат берилбей турганын билдирди.
