Чаткалдагы тоо-кен компанияларында лицензиялык документтердин жоктугу аныкталды
Жаратылыш ресурстары, экология жана техникалык көзөмөл министрлиги Жалал-Абад облусунун Чаткал районундагы эки тоо-кен компаниясында лицензиялоого чейинки текшерүү жүргүзүп, калдыктарды сактоочу жайларды пайдаланууда бир катар мыйзам бузууларды аныктады.
Министрликтин маалыматына ылайык, лицензиялоого чейинки текшерүү "Фулл Голд Майнинг" ЖЧКсында жана "Эти Бакыр Терексай" ЖЧКсында жүргүзүлдү.
Текшерүүнүн негизги максаты калдыктарды сактоочу жайларды эксплуатациялоодо экологиялык, техникалык жана өнөр жай коопсуздугу боюнча талаптардын сакталышын, ошондой эле долбоордук, уруксат берүүчү, лицензиялык жана нормативдик-техникалык документтердин бар-жогун аныктоо болду.
Текшерүүнүн жыйынтыгында калдыктарды сактоочу жайларды пайдаланууда бир катар мыйзам бузуулар аныкталып, айрым лицензиялык жана уруксат берүүчү документтер жок экени белгилүү болгон. Буга байланыштуу мыйзамга ылайык тиешелүү чаралар көрүлөрү айтылды.
Мындан тышкары, иш сапардын алкагында кооптуу өнөр жай калдыктарын жайгаштыруучу жайларды инвентаризациялоо жана калдыктар кадастрын жаңылоо иштери да жүргүзүлдү. Анын алкагында калдыктарды сактоочу жайлардан сырткары тоо тектеринин үймөлөрү, өнөр жай полигондору, техногендик түзүлүштөр, анын ичинде консервацияланган объектилер жана тоо-кен компанияларынын ишмердүүлүгүнөн пайда болгон калдыктардын көлөмү каралды.
Министрлик лицензияланууга тийиш болгон объектилердин ишин өз убагында лицензиялоого жана экологиялык, ошондой эле лицензиялык-уруксат берүү мыйзамдарынын талаптарын так сактоого чакырды.
