Чүйдө "Алексеич" сортундагы буудай жыйнала баштады
Чүй облусундагы Кыргыз мамлекеттик асыл тукум заводунда кылкандуу дан эгиндерин оруп-жыйноо иштери уланууда. Учурда 180 гектар аянттагы буудай жыйналып жатат. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, Кыргыз мамлекеттик асыл тукум заводу Чүй облусундагы 700 гектар жерге буудай, арпа, жүгөрү, беде, кант кызылчасы жана башка айыл чарба өсүмдүктөрүн өстүрөт.
Бүгүнкү күндө кылкандуу дан эгиндерин жыйноо иштери активдүү жүрүүдө. Жалпы 100 гектар аянттагы арпа толугу менен жыйналып бүттү. Ал эми 180 гектар жерге айдалган буудайды оруп-жыйноо уланууда.
Министрликтин маалыматына караганда, буудай айдалган аянттын 70 гектарын Россия Федерациясынан алып келинген "Алексеич" сортундагы үрөн ээлейт.
Жыйналган буудай үрөндүк жана сатууга арналган болуп бөлүнүп, кампага сакталууда. Завод быйыл бардык айыл чарба өсүмдүктөрүнөн жогорку түшүм алууну пландап жатат.
