Кара-Сууда жайыт жерге мыйзамсыз курулуш кургандарга айып салынды
Ош облусунун Кара-Суу районунда жайыт жерлерди мыйзамсыз пайдалануунун эки фактысы аныкталып, мыйзам бузган жарандарга административдик айып салынды. Бул тууралуу Айыл чарба министрлигинен билдиришти.
Жерди жана сууну көзөмөлдөө боюнча кызматтын Ош шаары жана Ош облусу боюнча аймактык башкармалыгы Кара-Суу районунун Чыйырчык участкасында текшерүү жүргүзүп, жайыт жерлерди мыйзамсыз пайдалануунун эки фактысын аныктады.
Текшерүүнүн жүрүшүндө эки жаран уруксатсыз курулуш жүргүзүп, жалпы 107 чарчы метр жайыт жердин кыртышын бузганы белгилүү болгон.
Аталган мыйзам бузуулар боюнча Кыргыз Республикасынын Укук бузуулар жөнүндө кодексинин 241-беренесинин негизинде ар бирине 5 миң 500 сомдон административдик айып салынды.
Мындан тышкары, жер кыртышын бузуу менен келтирилген зыян үчүн мыйзам бузгандарга жалпысынан 39 миң 804 сом өлчөмүндө доо коюлду.
Жерди жана сууну көзөмөлдөө боюнча кызмат жарандарды жер мыйзамдарын так сактоого чакырып, жайыт жерлеринде уруксатсыз курулуш жүргүзүү мыйзам жоопкерчилигине алып келерин эскертти.
