Кара-Сууда жол курган компанияга 200 миң сом айып салынды
Ош облусунун Кара-Суу районунда жол куруу иштерин текшерүү учурунда курулуш талаптарынын бузулганы аныкталып, подрядчы компанияга 200 миң сом айып салынды. Бул тууралуу Курулуш министрлигинен билдиришти.
Мамлекеттик архитектура-курулуш контролдоо департаментинин Ош региондук башкармалыгы Кара-Суу районундагы Т. Турдубеков көчөсүндө жүргүзүлүп жаткан жол куруу иштерине текшерүү жүргүздү.
Текшерүүнүн жүрүшүндө асфальт төшөө маалында жолго чектеш жайгашкан турак жайдын суу агызуучу арыктарына зыян келтирилгени аныкталган. Ошол эле учурда жолдун асфальт-бетон катмары долбоордук чечимдерге жана колдонуудагы курулуш талаптарына ылайык аткарылганы белгиленди.
Аныкталган мыйзам бузуу боюнча курулуш иштерин жүргүзгөн "Вольво Логистик" ЖЧКсына карата протокол түзүлүп, 200 миң сом өлчөмүндө айып пул салынды.
Мындан тышкары, компания тарабынан бузулган суу агызуучу арыктар толугу менен калыбына келтирилгени маалымдалды.
