Кашка-Баштагы 750 орундуу мектептин курулушу 70%га аяктады
Бишкек шаарындагы Кашка-Баш айылында курулуп жаткан 750 орундуу жаңы мектептин курулушу 70%га бүткөрүлдү. Учурда имараттын фасады жасалып, ички монтаждоо иштери жүрүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, мектеп Президент Садыр Жапаровдун тапшырмасы менен Бишкек шаарында курулуп жаткан 20 жаңы билим берүү мекемесинин бири болуп саналат.
Долбоор боюнча мектеп заманбап талаптарга ылайык салынып, окуучулардын сапаттуу билим алышы үчүн бардык шарттар каралган. Имараттын жалпы аянты 8 миң 234 чарчы метрди түзөт.
Мектептин аймагында эки футбол талаасы, волейбол жана баскетбол үчүн эки көп функционалдуу спорт аянтчасы, алты тилкелүү чуркоо жолу жана төрт тарабынан жашылдандырылган эс алуу аймактары курулат.
Учурда курулуш иштери комплекстүү жүрүп, имараттын сырткы фасады жасалууда жана ички монтаждоо иштери аткарылууда. Ошондой эле жайкы спорт аянтчаларын курууга даярдык көрүлүп жатат.
Министрликтин маалыматына караганда, мектептин курулушу ушул жылдын февраль айында башталган.
