Кыргызстан менен Россия эмгек мигранттарынын укуктук корголушун талкуулады
Кыргызстан менен Россиянын өкүлдөрү биргелешкен жумушчу топтун жыйынында эмгек мигранттарынын укуктук жана социалдык жактан корголушуна байланышкан актуалдуу маселелерди карап, кызматташууну улантууну макулдашты.
Эмгек, социалдык камсыздоо жана миграция министрлигинин маалыматына ылайык, видеоконференция форматында Кыргыз Өкмөтү менен Россия Федерациясынын Өкмөтүнүн алдындагы Биргелешкен кыргыз-орус жумушчу тобунун 18-жыйыны өттү.
Жыйынга эки өлкөнүн эмгек, тышкы иштер, ички иштер, билим берүү, саламаттык сактоо жана башка мамлекеттик органдарынын өкүлдөрү катышты. Кыргыз делегациясын эмгек, социалдык камсыздоо жана миграция министринин орун басары Мирлан Байгончоков, ал эми Россия тарапты Россиянын Ички иштер министрлигинин өкүлү, полициянын генерал-майору Константин Адзинов жетектеди.
Жыйындын жүрүшүндө тараптар мурда кабыл алынган чечимдердин аткарылышын карап чыгып, миграция тармагындагы учурдагы абал, эмгек миграциясына байланыштуу статистикалык маалыматтар жана эки өлкөнүн мыйзамдарындагы акыркы өзгөрүүлөр боюнча пикир алышты.
Өзгөчө көңүл Россия Федерациясында эмгектенип жаткан Кыргызстандын жарандарынын укуктук абалына жана алар туш болгон негизги көйгөйлөргө бурулду.
Жыйындын жыйынтыгында тараптар эмгек мигранттарынын укуктарын жана социалдык жактан корголушун камсыздоо боюнча биргелешкен ишти улантууга, ошондой эле көтөрүлгөн маселелерди өнөктөштүк негизде чечүүгө даяр экенин билдиришти.
