Жайыттарды бузган 109 факты аныкталып, 600 миң сомго жакын айып салынды
Жаратылыш ресурстары министрлигине караштуу Экологиялык жана техникалык көзөмөл кызматы жайыттарды коргоо боюнча рейддик иш-чараларды үзгүлтүксүз жүргүзүп жатат.
Министрлер Кабинетинин №330 токтомунун талаптарына ылайык өткөрүлүп жаткан рейддердин жүрүшүндө жыл башынан бери жайыттарды пайдалануу эрежелерин бузган 109 факты аныкталды. Анын негизинде мыйзам бузгандарга жалпы 600 миң сомго жакын административдик айып пул салынды.
Аталган токтомго ылайык, эндуро мотоциклдеринин, квадроциклдердин жана автоунаалардын жайыттарга көзөмөлсүз кирүүсүнө тыюу салынган.
Министрликтин маалыматына караганда, мындай техникалардын жайыттарга кирүүсү көк шибердин талкаланышына, өсүмдүк катмарынын бузулушуна жана жердин табигый абалына олуттуу зыян келтирет. Ошондуктан жайыттарды сактоо максатында көзөмөл иштери мындан ары да улантылары белгиленди.
