Бишкектеги мейманкананын курулушунда мыйзам бузуулар аныкталды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Бишкек шаардык башкармалыгы борбор калаадагы курулуш объектилеринде мыйзамдардын талаптарынын сакталышын көзөмөлдөөнү улантууда.
Министрликтин маалыматына ылайык, текшерүүнүн жүрүшүндө Бишкек шаарынын Дэн Сяопин проспектиси, 391 дарегинде жайгашкан үч кабаттуу мейманкананын курулушунда бир катар мыйзам бузуулар аныкталган.
Тактап айтканда, курулуш иштеринде курулуш ченемдери, техникалык регламенттер жана тармактагы башка милдеттүү талаптар толук сакталбаганы белгиленди.
Жыйынтыгында курулуш иштерин жүргүзүп жаткан "ПГС Элит" ЖЧКсына аныкталган мыйзам бузууларды белгиленген мөөнөттө жоюу боюнча көрсөтмө берилип, тиешелүү протокол түзүлдү. Ошондой эле компанияга 200 миң сом өлчөмүндө айып пул салынды.
Мыйзам бузуулар толук жоюлуп, курулуш мыйзамдарынын талаптары аткарылганга чейин объекттеги курулуш иштери убактылуу токтотулду.
