Чет өлкөдө төрөлгөн балага "Бала ырысын" кантип тариздөө керек?
Эмгек, социалдык камсыздоо жана миграция министрлиги чет өлкөдө төрөлгөн балдар үчүн "Бала ырысы" жөлөкпулун тариздөөнүн тартибин түшүндүрдү.
Маалыматка ылайык, эгерде балада Кыргыз Республикасынын жалпы жарандык паспорту жок болсо, алгач анын Кыргызстандын жарандыгына таандык экендигин тастыктоо талап кылынат.
Бул үчүн ата-энесинин бири же мыйзамдуу өкүлү "Кызмат" мамлекеттик мекемесинин Калкты тейлөө борборуна (КТБ) кайрылып, баланын Кыргыз Республикасынын жарандыгына таандык экендигин тастыктаган маалымкат алышы керек.
Калкты тейлөө борборуна кайрылууда маалымкат "Бала ырысы" жөлөкпулун тариздөө үчүн талап кылынарын кызматкерге алдын ала билдирүү зарыл. Ошондой эле арыз берүү үчүн электрондук кезекке талон алуу керек.
Министрликтин маалыматына ылайык, маалымкат белгиленген тартипте берилет жана аны даярдоо мөөнөтү 14 жумуш күнүнө чейин созулушу мүмкүн.
Ушуга байланыштуу министрлик жарандарды жөлөкпулду дайындоодо кечигүүлөргө жол бербөө үчүн керектүү документти алдын ала тариздеп алууга чакырды.
