Чүйдө өрттөнгөн клубга 1,4 млн сом камсыздандыруу төлөмү берилди

Чүй облусунун Жайыл районуна караштуу Полтавка айылындагы өрттөнүп кеткен жайкы клуб үчүн 1 млн 408 миң 954 сом камсыздандыруу төлөндү. Бул тууралуу Мамлекеттик камсыздандыруу уюму билдирди.

Маалыматка ылайык, жайкы клуб кыска туташуунун кесепетинен толугу менен күйүп кеткен. Объект 2024-жылдын 18-июнунда ыктыярдуу камсыздандыруу полиси боюнча камсыздандырылган.

Өрт боюнча материалдар 2026-жылдын 7-июлунда камсыздандыруу төлөмдөрү бөлүмүнө кароого жөнөтүлгөн. Анын жыйынтыгында 17-июлда камсыздандыруу төлөмү Ынтымак айыл өкмөтүнө толук көлөмдө которулган.

Мамлекеттик камсыздандыруу уюму белгилегендей, камсыздандыруу төлөмү өрттөн келтирилген чыгымды жабууга жана объектти калыбына келтирүүгө көмөк көрсөтөт.