Импорттолгон азык-түлүк эми "Санарип VET" аркылуу текшерилет
Кыргызстанга үчүнчү өлкөлөрдөн импорттолгон ветеринардык көзөмөлдөгү жүктөр эми "Санарип VET" маалыматтык системасы аркылуу текшерилип, бардык процесс электрондук форматта жүргүзүлүүдө. Бул тууралуу Айыл чарба министрлигинен билдиришти.
Кыргызстанда ветеринардык көзөмөл системасын санариптештирүү, мамлекеттик кызмат көрсөтүүлөрдүн ачык-айкындуулугун камсыз кылуу жана азык-түлүк коопсуздугун чыңдоо максатында үчүнчү өлкөлөрдөн импорттолгон ветеринардык көзөмөлгө алынуучу жүктөрдү кароо "Санарип VET" маалыматтык системасы аркылуу жүргүзүлүп жатат.
Ветеринардык көзөмөл Кыргызстандын мамлекеттик чек арасындагы ветеринардык контролдоо пункттарынын бири болгон «Кант» убактылуу сактоочу кампасында жүргүзүлөт. Кароо учурунда ветеринардык инспекторлор кызматтык боди-камераларды колдонуп, бардык текшерүү процессин видеого жаздырып турушат. Бул көзөмөлдүн ачык-айкындуулугун камсыздап, талаштуу жагдайлардын алдын алууга шарт түзөт.
Алгач жүктү коштогон ветеринардык сертификат, ташып кирүүгө уруксат берүүчү документ, инвойс жана транспорттук документтер текшерилет. Ошондой эле алардын Евразия экономикалык бирлигинин ветеринардык-санитардык талаптарына шайкештиги жана өндүрүүчү ишкананын ЕАЭБдин реестрине киргизилгени аныкталат.
Андан соң продукцияга физикалык көзөмөл жүргүзүлүп, таңгактары, маркировкасы, чыгарылган күнү, жарактуулук мөөнөтү, температуралык режими жана жалпы абалы текшерилет. Зарыл болгон учурда лабораториялык изилдөө үчүн үлгүлөр алынып, жыйынтык чыкканга чейин жүк бажы көзөмөлүндө сакталат.
Текшерүүнүн бардык жыйынтыгы "Санарип VET" маалыматтык системасына планшет аркылуу ошол жерде киргизилип, ветеринардык кароо актысы автоматтык түрдө электрондук форматта түзүлөт. Талаптарга жооп берген жүктөргө андан ары бажылык тариздөөгө уруксат берилет. Ал эми ветеринардык-санитардык талаптарга жооп бербеген учурларда мыйзамга ылайык тиешелүү чаралар көрүлөт.
Адистердин айтымында, "Санарип VET" маалыматтык системасы менен кызматтык боди-камераларды колдонуу мамлекеттик ветеринардык көзөмөлдүн натыйжалуулугун жогорулатып, документ жүгүртүүнү жөнөкөйлөтүүгө жана өлкөгө коопсуз азык-түлүк продукциясынын гана киришин камсыз кылууга өбөлгө түзөт.
