Ошто мыйзамсыз жер казуудан мамлекетке 78,6 млн сом зыян келтирилген

Ош шаардык прокуратурасы тарабынан жер казынасын пайдалануу боюнча мыйзамдардын аткарылышын текшерүүнүн жүрүшүндө бир катар мыйзам бузуулар аныкталды.

Башкы прокуратуранын маалыматына ылайык, Ош шаарынын мэриясы тиешелүү ыйгарым укугу жок болсо да кум-шагыл аралашмасы менен чопо топурагын казып алууга укук берүүчү 33 күбөлүктү мыйзамсыз берген.

Мындан тышкары, Жапалак айылдык аймактык башкармалыгынын кызмат адамдары жасалма токтомдордун негизинде жайыт жерлерин жеке жактарга мыйзамсыз өткөрүп берип, анын кесепетинен мамлекетке 78 млн 600 миң сом зыян келтирилгени аныкталган.

Ошондой эле Ош–Ноокат автожолунун боюнда иш жүргүзгөн айрым ишканалар лицензияда көрсөтүлгөн аймактан тышкары кум-шагыл аралашмасын казып алышып, жер кыртышын бузганы белгиленди.

Текшерүүнүн жыйынтыгында Ош шаардык прокуратурасы тарабынан Кылмыш-жаза кодексинин 337-беренеси ("Кызмат абалынан кыянаттык менен пайдалануу") боюнча үч кылмыш иши козголуп, учурда тергөө амалдары жүрүп жатат.

Ошондой эле мыйзамсыз берилген жер тилкелерин жана күбөлүктөрдү жокко чыгаруу, бузулган жерлерди калыбына келтирүү жана тиешелүү лицензияларды кайтарып алуу боюнча Ош шаарынын мэрине жана Жаратылыш ресурстары, экология жана техникалык көзөмөл министрлигине сунуштамалар киргизилип, алар учурда каралууда.