Таластагы "Жер Үй" алтын кениндеги курулуштарга мониторинг жүргүзүлдү
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Талас региондук башкармалыгы Таластагы "Жер Үй" алтын кен комбинатынын казып алуу комплексиндеги курулуш объектилерине мониторинг жүргүздү.
Министрликтин маалыматына ылайык, мониторинг вахталык шаарчанын административдик-тиричилик корпусу жана 224 орундуу жатакананын курулуш иштерин камтыды.
Текшерүүнүн негизги максаты курулуш, архитектура жана шаар куруу чөйрөсүндөгү мыйзамдардын талаптарынын, техникалык регламенттердин жана курулуш ченемдеринин сакталышын, ошондой эле курулуш-монтаждоо иштеринин сапатын баалоо болду.
Мониторингдин жүрүшүндө автордук жана техникалык көзөмөл өкүлдөрүнүн катышуусунда курулуштун экинчи этабы боюнча аткарылган иштер каралды. Адистер курулуштун долбоордук документацияга шайкештигин, аткаруу-техникалык документтердин толуктугун, курулуш материалдарынын сапатын жана конструктивдик элементтердин аткарылышын текшеришти.
Жыйынтыгында подряддык уюмга курулуш иштеринин сапатына туруктуу көзөмөл жүргүзүү, этаптык кабыл алуу иштерин белгиленген талаптарга ылайык уюштуруу жана курулуш материалдарын өз убагында лабораториялык текшерүүдөн өткөрүү боюнча сунуштар берилди.
