Жаңы конуштардагы 300гө жакын жер тилкесин мыйзамдаштыруу маселеси көтөрүлдү
Бишкек шаарынын мэри Айбек Джунушалиев "Нуркожо-Ата" жана "Адилет" конуштарынын тургундары менен көчмө жолугушуу өткөрүп, аймактагы актуалдуу маселелерди талкуулады.
Мэриянын маалыматына ылайык, жолугушууда тургундар жолдорду кеңейтүү, коомдук транспорттун каттамын жакшыртуу, таза суу менен камсыздоо жана жер мунапысынын алкагында корголуучу аймактагы 300гө жакын жер тилкесин мыйзамдаштыруу маселелерин көтөрүштү.
Ошондой эле жергиликтүү тургундар ашар жолу менен селден коргоочу дамба курууну сунушташты. Мэр бул демилгени кароо үчүн дамбанын долбоорун даярдап, бардык тобокелчиликтерди баалоо жана маселени кеңири иштеп чыгуу боюнча атайын комиссия түзүүнү тапшырды.
Мындан тышкары, "Нуркожо-Ата" конушунда суу топтоочу курулма жана эски мектептин ордундагы бала бакчанын аймагын кеңейтүү үчүн каралган 6 гектар жер тилкесин сатып алуу же алмаштыруу мүмкүнчүлүгүн карап чыгуу тапшырмасы берилди.
Жолугушууда дзюдо секциясынын машыгуу жайы боюнча маселе да көтөрүлдү. Ага ылайык, машыгууларды убактылуу мектептин спорт залына көчүрүү жана келечекте жаңы дене тарбия-чыңдоо комплексин куруу долбоорун иштеп чыгуу тапшырылды. Бул секцияда бир нече жаңы конуштардан келген балдар машыгышат.
Андан соң шаар башчысы "Ак-Бата" конушунда курулуп жаткан мектептин курулушунун жүрүшү менен таанышып чыкты. Жыйынтыгында ал курулуш иштеринин сапатын жана мөөнөттөрүн өзгөчө көзөмөлдөөнү, ошондой эле мектепти газ менен жылытуу мүмкүнчүлүгүн кароону тапшырды.
