Суусамырда мазут төгүлгөн кырсыктан улам экологиялык зыян кайра эсептелди
Суусамыр өрөөнүндө жол кырсыгынан кийин жерге төгүлгөн мазут боюнча кошумча эсептөө жүргүзүлүп, жер кыртышына келтирилген зыян үчүн дагы 10 миң 80 сом өлчөмүндө доо коюлду. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, министрликке караштуу Экологиялык жана техникалык көзөмөл кызматынын Чүй регионалдык башкармалыгынын инспекторлору Бишкек–Ош унаа жолунун 205-чакырымындагы тилкеде кошумча тактоо жана эсептөө иштерин жүргүзүшкөн.
Анын жыйынтыгында жер кыртышына келтирилген зыян кайра эсептелип, мурда коюлган талапка кошумча дагы 10 миң 80 сом өлчөмүндө доо коюлган.
Ошондой эле адистер тарабынан жол кырсыгынын кесепетинен жерге төгүлгөн мазуттун калдыктары өз убагында толугу менен тазаланып, зыянсыздандырылганы белгиленди.
Эске салсак, буга чейин Суусамыр өрөөнүндө мазут ташып бара жаткан жүк ташуучу унаа жол кырсыгына кабылып, оодарылып кеткен. Натыйжада болжол менен 4–5 тонна мазут жерге төгүлгөнү тууралуу маалымат социалдык тармактарга тараган.
Аталган факты боюнча Кыргыз Республикасынын Укук бузуулар жөнүндө кодексинин 237-беренесине ылайык, күнөөлүү жеке жакка 20 миң сом өлчөмүндө айып пул салынган.
