Жарандар акысыз юридикалык жардамды кандай шартта ала алышат?
Кыргызстанда ар бир жаран муктаж болгон учурларда мамлекет кепилдеген акысыз юридикалык жардам ала алышат. Бул укук Баш мыйзамда каралган.
Юридикалык жардам кызматы билдиргендей, алар жарандарга укуктары жана милдеттери боюнча түшүндүрмө берип, мыйзамдар тууралуу маалыматтарды сунуштайт.
Адвокаттын акысыз кызматын алуу үчүн жарандын айлык кирешеси республикалык бюджет жөнүндө мыйзамда жыл сайын белгиленген минималдуу эмгек акынын 60 эсе өлчөмүнөн ашпоого тийиш.
Маалыматка ылайык, мамлекет кепилдеген юридикалык жардамдын биринчи түрү — консультациялык жардам. Анын алкагында жарандар мыйзамдар, укук системасы, өздөрүнүн укуктары жана милдеттери боюнча кеңеш ала алышат.
Экинчиси — квалификациялуу юридикалык жардам. Бул кылмыш, административдик жана жарандык иштер боюнча жарандын укуктарын коргоого жардам берген адвокаттын кызматын камтыйт.
