Кыргызстан менен Кытай билим берүү тармагындагы кызматташтыкты өнүктүрөт
Бүгүн Жогорку Кеңештин депутаты Токтобүбү Ашымбаева Ишеналы Арабаев атындагы Кыргыз мамлекеттик университети менен Кытайдын "Tang Chinese Education and Technology" компаниясынын ортосунда өз ара түшүнүшүү жөнүндө меморандумга кол коюу аземине катышты. Бул тууралуу Жогорку Кеңештин басма сөз кызматы билдирди.
Меморандум Кыргызстанда "Tang International Education" программаларын ишке ашырууга, кытай тилин эл аралык стандарттарга ылайык окутууга, ошондой эле жасалма интеллект жана жашыл энергетика сыяктуу келечектүү багыттарды камтыган "Келечек үчүн компетенциялар борборун" этап-этабы менен түзүүгө багытталган.
Иш-чарада депутат Токтобүбү Ашымбаева эки өлкөнүн билим берүү тармагындагы кызматташтыгын өнүктүрүү маанилүү экенин белгиледи. Анын айтымында, заманбап технологияларды колдонуу менен атаандаштыкка жөндөмдүү жана квалификациялуу кадрларды даярдоо бүгүнкү күндүн негизги талаптарынын бири.
Ошондой эле эл өкүлү Кытай-Кыргызстан-Өзбекстан темир жолун ишке ашыруунун алкагында квалификациялуу адистерге болгон муктаждык өсөрүн белгилеп, бул багытта биргелешкен атайын билим берүү программаларын иштеп чыгууну сунуштады.
Мындан тышкары, Токтобүбү Ашымбаева Кыргызстан эки өлкөнүн ортосундагы кызматташтыкты өнүктүрүүгө багытталган демилгелерди колдоого даяр экенин айтып, мындай долбоорлор университеттер аралык байланышты кеңейтүү менен катар Кыргызстан менен Кытайдын достук мамилелерин чыңдоого да салым кошорун кошумчалады.
