Жаңы ысымдар жана алга жылуу үчүн гранттар
Бишкекте өткөн II Эл аралык UmutDoc даректүү тасмалардын фестивалы аяктады. Ал 10-сентябрдан 14-сентябрга чейин өткөрүлүп, кинематографисттерди, тармактын кесипкөй адистерин, эл аралык эксперттерди жана даректүү тасмалар боюнча көрүүчүлөрдүн башын бириктирди. Сынактык программага сегиз өлкөдөн: Кыргызстан, Казакстан, Молдова, Азербайжан, Грузия, Латвия, Тажикстан жана Өзбекстандан келген 8 толук метраждуу жана 16 кыска метраждуу даректүү тасмалар сунушталды.
Иш-чаранын жыйынтыгы боюнча, көрүүчүлөрдүн сүймөнчүлүгү сыйлыгын: Шахзода Миракованын (Өзбекстан) “Бутак” жана Алиман Токтогулова менен Караш Жанышовдун (Кыргызстан) “Иттер” тасмалары алышты. Ал эми Алина Байтокованын (Казакстан) “Long Distance” тасмасы атайын белгиленип, Фариза Танайдын (Казакстан) “Сулуу” тасмасы атайын сыйлыкка ээ болду. Алямдар Фаиг оглы Дадашовдун (Азербайжан) “Кара мышык, Ак Шани” кыска метраждуу даректүү тасмасындагы эмгеги - мыкты режиссёр сыйлыгына татыса, мыкты кыска метраждуу тасма болуп - Пайрав Шарифовдун (Тажикстан) - “Ягноб” тасмасы тандалды.
Толук мераждуу даректүү тасмалар сынагында Студенттик калыстар тобунун сыйлыгы Раиса Размеританын (Молдова) “Санта айымдын тандоосу” тасмасына ыйгарылып, ал дагы атайын сыйлыкка ээ болду. Кристина Михайлованын (Казакстан) “Дарыянын түшү” - мыкты деп табылса, “Мыкты режиссёр” сыйлыгы “Биз бул жерде жашайбыз” (Казакстан) тасмасындагы эмгеги үчүн Жанана Курмашевага ыйгарылды.
КРнын Кинематографисттер союзу, Qarash lab, Сынчы, “Базаровдун Альтернативасы”, New York Film Academy Kazakhstan, Distribution Аward жана Algimantas Vidugiris Award сыйлыгы дагы фестивалдын катышуучуларын байгелер менен белгилешти.
Питчингдин жыйынтыгы боюнча Кинематография департаментинин финансылык колдоосу - режиссер Жаныл Жусупжандын (Кыргызстан) “Ак жүрөк” долбооруна, Кыргызстан, Эстон жана Франция биргелешкен “Тигиш артынан тигиш” (режиссёр Алина Байтокова, продюсер Адилет Каржоев) жана Нурлан Анарбаевдин “41 жылдан кийин” кыргыз тасмасына берилди. Креативдүү Индустриялар Паркы Тажикстан жана Өзбекстандан келген Заррин Санвардын “Papaver Somniferum” тасмасын колдоду. Адам укуктары боюнча “Бир Дүйнө” эл аралык даректүү тасмалар фестивалы Тынымгүл Эшиеванын “Мөңгүлөрдүн үнү” жана Дастан Боркош менен Алиман Токтогулованын “Өрүктөрдүн мезгили” аттуу кыргыз тасмаларына, ошондой эле Айжан Касымбектин “Таттуу сүттүү жүгөрү” казакстандык долбооруна каржылык колдоо көрсөттү. Мындан тышкары, “Кыргызфильм” улуттук киностудиясы “Мөңгүлөрдүн үнү” жана “Өрүктөрдүн мезгили” тасмаларынын жаратуучуларына толук өндүрүштүк колдоо көрсөтүү үчүн сертификаттарды берди. Ошондой эле New York Film Academy Kazakhstan дагы питчинг катышуучуларына жалпы суммасы 15 000 долларлык сертификаттарды тапшырды.
Фестиваль үчүн тасмаларды көрсөтүү гана эмес, диалог, кесиптик өсүш жана жаңы эл аралык байланыштар үчүн мүмкүнчүлүктөрдү түзүү маанилүү. Дал ошондуктан UmutDoc Борбордук Азияны дүйнөлүк даректүү тасмалар коомчулугу менен байланыштырган мейкиндик катары өнүгүп келе жатат.
