Бишкекте Кыргызстан менен Литванын саясий консультациялары өттү
15-сентябрда Бишкек шаарында Тышкы иштер министрлиги менен Литванын Тышкы иштер министрлигинин ортосунда саясий консультациялардын III раунду өттү. Бул тууралуу министрликтин маалымат кызматы кабарлады.
Кыргыз делегациясын тышкы иштер министринин орун басары Медер Абакиров, Литва делегациясын тышкы иштер министринин орун басары Криступас Вайтекунас жетектеди.
Жолугушууда эки өлкөнүн ортосундагы саясий диалогду мындан ары өнүктүрүү, анын ичинде жогорку жана эң жогорку деңгээлдеги өз ара визиттерди уюштуруу маселелери талкууланды. Ошондой эле миграция жана туризм тармагындагы кызматташууга көңүл бурулду.
Тараптар соода-экономикалык байланыштарды кеңейтүүнүн перспективдүү багыттарын, анын ичинде санариптештирүү, транспорт, логистика жана энергетика тармактарын талкуулашты. Мындан тышкары, ишкерлердин байланыштарын чыңдоо, кыргыз-литва бизнес-форумун өткөрүү жана биргелешкен пилоттук долбоорлорду ишке ашыруу боюнча пикир алмашылды.
Консультациялардын жүрүшүндө аймактык жана эл аралык күн тартиби да каралып, БУУ жана Европа Биримдиги сыяктуу эл аралык уюмдардын алкагындагы өз ара аракеттенүү маселелери талкууланды.
